Matthías og Pétur Reidar með punktabætingu
Í dag kepptu fjórir menn úr alpagreinalandsliðinu á alþjóðlegu svigmóti í Storklinten í Svíþjóð og skiluðu allir sér niður.
Matthías Kristinsson átti frábæran dag og hafnaði í 2. sæti, aðeins 0,63 sekúndum frá sigri. Þetta er besti árangur Matthíasar á tímabilinu og punktabæting hjá honum.
Skíðasambandið náði tali af Matthíasi eftir mótið í dag og þetta hafði hann að segja:
"Gott að komast aftur á rétta leið eftir erfiðar keppnir í Levi. Aðstæður eru allt aðrar en við höfum verið að æfa síðasta mánuðinn. Hef mikla trú á okkur á morgun."
Gauti Guðmundsson kom í mark í deildu 9. sæti eftir tvær sterkar ferðir og heldur áfram að sýna stöðugleika í keppni á erlendum vettvangi.
Jón Erik Sigurðsson náði sér ekki á strik í dag og endaði í 20. sæti, en B-landsliðsmaðurinn okkar Pétur Reidar Pétursson endaði í 36. sæti eftir að hafa verið með rásnúmer 61 og bætir punktastöðu sína.
Mótið í Storklinten er mikilvægur liður í undirbúningi strákanna fyrir veturinn. Næstu vikurnar halda þeir niður til Evrópu þar sem þeir verða með bækistöð í Pitztal í Austurríki og halda áfram að keppa þar.
Skíðasambandið óskar Matthíasi innilega til hamingju með verðlaunasætið og Pétri Reidar til hamingju með punktabætinguna.
