Kristrún Guðnadóttir leggur skíðin á hilluna eftir farsælan landsliðsferil og tvo Ólympíuleika

Landsliðskonan og Ólympíufarinn Kristrún Guðnadóttir hefur tekið þá erfiðu ákvörðun að leggja keppnisskíðin á hilluna og gefa ekki kost á sér áfram í landsliði Íslands í skíðagöngu.

Kristrún gekkst nýverið undir aðgerð á hné eftir að hún meiddist alvarlega fyrir nokkrum vikum. Að sögn lækna er áverkinn þess eðlis að ekki telst raunhæft að hún geti haldið áfram keppni á því afreksstigi sem hún hefur verið á undanfarin ár.

Ákvörðunin hefur verið henni þung, enda hefur Kristrún á ferli sínum sýnt einstaka þrautseigju og óbilandi vilja til að koma sterk til baka eftir ítrekuð meiðsli. Hún hefur ítrekað sannað sig sem einn fremsti og dugmesti keppandi Íslands í skíðagöngu.

Glæsilegur ferill á alþjóðavettvangi

Kristrún á að baki glæsilegan alþjóðlegan feril og hefur keppt á tveimur Ólympíuleikum, með þrjár rásir að baki:

• Peking 2022 – sprettganga
• Milano Cortina 2026 – sprettganga og 10 km

Hún hefur jafnframt tekið þátt í þremur heimsmeistaramótum og gengið alls sex rásir:

• Lahti (U23) 2019
• Seefeld 2019
• Oberwiesenthal (U23) 2020
• Planica 2023
• Þrándheimur 2025

Á ferlinum keppti Kristrún í 164 alþjóðlegum FIS-keppnum, varð 14 sinnum Íslandsmeistari í einstaklingsgreinum og vann jafnframt til sjö silfurverðlauna og tveggja bronsverðlauna á Skíðamóti Íslands.

Besta árangri sínum á alþjóðavettvangi náði hún í desember 2023 þegar hún hafnaði í 14. sæti í Scandinavian Cup í Vuokatti í Finnlandi. Þar að auki á Kristrún besta tíma allra íslenskra kvenna frá upphafi í Vasaloppet (Vasagöngunni), einni virtustu skíðagöngu heims.

Fyrirmynd og drifkraftur innan skíðahreyfingarinnar

Kristrún hefur ekki aðeins skarað fram úr sem afreksíþróttamaður, heldur einnig verið afar mikilvæg fyrirmynd innan íslensku skíðahreyfingarinnar. Hún hefur haft jákvæð áhrif á liðsheild landsliðsins, sýnt leiðtogahæfni í daglegu starfi og verið hvatning fyrir yngri iðkendur, ekki síst ungar stúlkur í íþróttinni.

Ný verkefni fram undan

Kristrún hyggst nú, meðal annars, snúa sér að störfum innan skíðahreyfingarinnar. Hún hefur lýst áhuga á að vinna að verkefnum í samstarfi við Skíðasamband Íslands, meðal annars tengdum afrekshópi, hæfileikamótun og að efla þátttöku stúlkna í skíðaíþróttum.

Þakklæti og framtíðarkveðjur

Skíðasamband Íslands færir Kristrúnu Guðnadóttur innilegar þakkir fyrir hennar ómetanlega framlag til íslenskrar skíðagöngu og óskar henni alls hins besta í komandi verkefnum og framtíðinni.