Íslenskir skíða- og snjóbrettaiðkendur í alþjóðlegum æfingabúðum FIS

Nýverið tóku íslenskir skíða- og snjóbrettaiðkendur þátt í alþjóðlegum æfingabúðum á vegum Alþjóðaskíða- og snjóbrettasambandsins (FIS). Æfingabúðirnar fóru fram í Landgraaf í Hollandi og Falun í Svíþjóð, þar sem iðkendurnir fengu dýrmætt tækifæri til að æfa við góðar aðstæður, kynnast jafnöldrum frá öðrum löndum og öðlast alþjóðlega reynslu.

Snjóbrettaiðkendur æfðu og kepptu í Hollandi

Snjóbrettaiðkendurnir Arnar Freyr Jóhannsson og Steinunn María Þórarinsdóttir, bæði úr BFH og afrekshópi SKÍ í snjóbrettum, voru valin til þátttöku í alþjóðlegum æfingabúðum FIS í Landgraaf í Hollandi.

Alls tóku um 50 iðkendur frá 15 þjóðum þátt í æfingabúðunum, sem fóru fram í SnowWorld Landgraaf, þar sem boðið er upp á snjóaðstæður innandyra allt árið um kring.

Auk fjölbreyttra æfinga tóku Arnar Freyr og Steinunn María þátt í alþjóðlegum FIS-mótum dagana 24.–26. september og öðluðust þar dýrmæta keppnisreynslu. Meðal annars náði Steinunn María 7. sæti og Arnar Freyr 21. sæti í Slopestyle.

Með þeim í för var Borgþór Ómar Jóhannsson, þjálfari hjá BFH, sem fékk einnig tækifæri til að öðlast dýrmæta reynslu og kynnast öðrum þjálfurum í alþjóðlegu umhverfi.

Nánari úrslit mótanna má finna á heimasíðu FIS hér

Skíðagöngufólk í fjölþjóðlegum æfingabúðum í Falun

Fjórir íslenskir skíðagönguiðkendur tóku þátt í æfingabúðum FIS í Falun í Svíþjóð. Það voru þau Jökull Ingimundur Hlynsson úr SFS, Matthías Karl Ólafsson og Vala Kristín Georgsdóttir úr Ulli og Karen Emilía Káradóttir úr SKA.

Með hópnum fór Sveinbjörn Orri Heimisson, sem stundar nú nám við íþróttaháskólann í Ósló.

Alls tóku 44 ungir iðkendur frá 14 löndum þátt í æfingabúðunum. Þar á meðal voru þátttakendur frá Taívan og Brasilíu, sem ferðuðust langa leið til að taka þátt.

Æfingabúðirnar voru haldnar í Falun í boði skipuleggjenda heimsmeistaramótsins í norrænum greinum sem fram fer þar árið 2027.

Í þjálfarateymi FIS var meðal annars Ítalinn Emanuele Becchis, betur þekktur sem „Lele“, sem er einn fremsti sprettgöngumaður heims á hjólaskíðum. Becchis hefur fimm sinnum orðið heimsmeistari í sprettgöngu á hjólaskíðum og setti heimsmet í 100 metra spretti í Oberammergau í Þýskalandi árið 2019. Hann er enn í fremstu röð og sigraði meðal annars í 200 metra spretti á heimsbikarmóti FIS í Val di Fiemme í september 2026. Það var því dýrmætt fyrir íslensku iðkendurna að fá tækifæri til að kynnast vinnubrögðum svo reynslumikils keppnismanns.

Að sögn Sveinbjörns Orra var ferðin ekki síður lærdómsrík fyrir hann sjálfan. Hann fékk tækifæri til að hitta aðra þjálfara, fylgjast með vinnubrögðum þjálfara FIS og öðlast reynslu af því að fylgja hópi ungra iðkenda í alþjóðlegar æfingabúðir.

Góðar aðstæður og lærdómsríkar æfingar

Það sem stóð sérstaklega upp úr hjá íslensku iðkendunum í Falun var að fá að æfa við góðar aðstæður, sérstaklega á hjólaskíðabrautinni, og æfa með jafnöldrum frá öðrum löndum.

Vala Kristín segir að bæði æfingaaðstaðan og félagsskapurinn hafi gert dvölina eftirminnilega.

„Mér fannst standa upp úr hvað það var gaman að æfa við svona góðar aðstæður, sérstaklega á hjólaskíðabrautinni sem var mjög góð. Það var líka mjög skemmtilegt að æfa með svona mörgum krökkum frá mismunandi löndum og kynnast þeim,“ segir Vala Kristín.

Hún segir tækniæfingarnar undir leiðsögn reyndra þjálfara hafa verið sérstaklega lærdómsríkar.

„Það var gaman að geta borið sig saman við krakkana frá hinum löndunum og séð hvar ég stend miðað við þau. Ég lærði líka mikið af hinum og fékk nýjar hugmyndir sem ég get nýtt á mínum eigin æfingum.“

Dýrmæt reynsla fyrir framtíðina

Alþjóðlegar æfingabúðir FIS gegna mikilvægu hlutverki í uppbyggingu ungra og efnilegra skíða- og snjóbrettaiðkenda. Slík þátttaka veitir þeim nýja reynslu og innsýn í alþjóðlegt æfinga- og keppnisumhverfi.

SKÍ fagnar þátttöku íslensku iðkendanna og þakkar þjálfurum þeirra fyrir þeirra framlag til vel heppnaðra æfingabúða.