Íslenskir keppendur lokið keppni á HM unglinga og U23 í Lillehammer

Þátttöku íslensku keppendanna á Heimsmeistaramóti unglinga og U23 í norrænum greinum lauk í dag í Lillehammer í Noregi.

Í dag kepptu keppendur í U23 flokki í 10 km skíðagöngu með hefðbundinni aðferð. Einar Árni Gíslason átti frábæra göngu og endaði í 49. sæti. Ástmar Helgi Kristinsson átti einnig fína göngu og skilaði einni af sínum betri göngum í vetur.

Sjá úrslit hér

Í gær kepptu yngri strákarnir í sömu vegalengd. Grétar Smári Samúelsson átti þar góða göngu og varð í 69. sæti. Hjalti Böðvarsson byrjaði gönguna vel en þurfti því miður að hætta keppni áður en henni lauk.

Sjá úrslit hér

Mótinu er þar með lokið fyrir íslensku keppendurna og hafa allir strákarnir keppt í þremur greinum á mótinu: sprettgöngu, 20 km hópstarti og 10 km göngu. Árangurinn hefur í heildina verið góður. Nokkrar mjög góðar göngur sáust á mótinu, þó að ekki fari allt alltaf alveg eins og vonast er eftir.

Þetta hefur verið skemmtileg og lærdómsrík vika í Lillehammer og hópurinn skipaður efnilegum keppendum sem eiga framtíðina fyrir sér í skíðagöngu.

Um helgina keppir Kristrún Guðnadóttir á Norgescup mótaröðinni á Skeikampen. Í gær var keppt í 5 km göngu með hefðbundinni aðferð þar sem Kristrún endaði í 47. sæti og fékk 139 FIS punkta, sem eru hennar bestu punktar í lengri tíma.

Í dag var síðan keppt í sprettgöngu, þar sem Kristrún varð í 34. sæti eftir forkeppnina, aðeins fjórum sætum frá því að komast áfram í útsláttarkeppnina. Hún náði einnig góðum FIS punktum í þeirri keppni.

Á morgun verður svo keppt í 30 km skíðagöngu með frjálsri aðferð á mótinu.

Ævar Freyr Valbjörnsson keppti einnig á sama móti og Kristrún og átti góðar göngur. Í 5 km göngunni fékk hann 165 FIS punkta, sem eru hans bestu punktar í mjög langan tíma.

Á morgun keppir Dagur Benediktsson í Heimsbikarnum í Lahti í Finnlandi, þar sem keppt verður í 10 km skíðagöngu með frjálsri aðferð. Þetta verður annar heimsbikarinn sem Dagur tekur þátt í eftir Ólympíuleikana. Fyrir skömmu keppti hann í 20 km skiptigöngu í Falun í Svíþjóð, þar sem hann náði sínum besta árangri til þessa í skiptigöngu.

Sjá úrslit í beinni hér

Liðið með aðstoðarmönnum, smurningsmanni, testurum og bílstjóra: Einar Árni Gíslason, Grétar Smári Samúelsson, Þorsteinn Hymer, Ólafur Björnsson, Hjalti Böðvarsson, Ástmar Helgi Kristinsson, Hlynur Kristinsson, Sveinbjörn Orri Heimisson, Fróði Hymer.