Ísland öðlast fulla aðild að Alþjóða Skíðaskotfimisambandinu (IBU)

Sigurður Hauksson framkvæmdastjóri SKÍ með Olle Dahlin forseta IBU (2018-2026)
Sigurður Hauksson framkvæmdastjóri SKÍ með Olle Dahlin forseta IBU (2018-2026)
21. sep. 2026

Á þingi Alþjóða skíðaskotfimisambandsins (IBU) í Berchtesgaden í Þýskalandi um helgina var umsókn Skíðasambands Íslands (SKÍ) um fulla aðild að sambandinu samþykkt með öllum greiddum atkvæðum.

Þetta eru mikilvæg tímamót fyrir uppbyggingu skíðaskotfimi á Íslandi. Skíðaskotfimi er ein þeirra íþróttagreina sem starfræktar eru innan vébanda SKÍ, ásamt alpagreinum, skíðagöngu, snjóbrettum og skíðafimi.

Fulltrúar SKÍ á þinginu voru Sigurður Hauksson, framkvæmdastjóri, Veronika Guseva, formaður skíðaskotfiminefndar, og Ingólfur Hannesson, ráðgjafi og heiðursfélagi IBU.

Með fullri aðild öðlast SKÍ aðgang að fjölbreyttum útbreiðslu‑ og uppbyggingarverkefnum IBU, en sambandið hefur vaxið hraðar á undanförnum árum og áratugum en flest önnur alþjóðasambönd innan íþrótta.

Olle Dahlin, forseti IBU, lýsti yfir mikilli ánægju með aðild Íslands og það starf sem unnið hefur verið síðustu ár:

„Við hófum í raun þessa vegferð árið 2008 þegar við Ingólfur áttum spjall á heimsmeistaramótinu í Svíþjóð. Vegferðin hefur því verið löng. Það er sérstaklega gleðilegt fyrir okkur hjá IBU að sérstök áhersla SKÍ er á að kynna okkar frábæru íþrótt fyrir börnum og unglingum. “

Veronika Guseva (áður Lagun) þekkir skíðaskotfimi vel af eigin raun en hún keppti á heimsbikarmótum IBU fyrir Litháen á árunum 2002–2006. Hún flutti til Íslands árið 2007 og starfar nú sem grunnskólakennari á Akureyri.

Veronika segir fulla aðild Íslands að IBU marka spennandi tímamót:

„Það er hreint ævintýri fyrir mig að taka þátt í þessari vegferð og tengjast á ný íþróttinni sem er mér svo kær. Nú hefst nýr kafli og ég og mitt fólk hlökkum mikið til að taka næstu skref.

Með fullri aðild að IBU hefst því nýr kafli í uppbyggingu skíðaskotfimi á Íslandi, með auknum möguleikum til alþjóðlegs samstarfs og frekari þróunar greinarinnar hér á landi.

Til baka