Mikið um að vera hjá landsliðsfólki SKÍ, undirbúningur fyrir Ólympíuleikana í hámarki

Mikið um að vera hjá landsliðsfólki SKÍ

Undirbúningur landsliða Skíðasambands Íslands fyrir Ólympíuleikana stendur nú sem hæst og næstu dagar verða afar annsamir hjá íslenskum keppendum í alpagreinum, skíðagöngu og snjóbretti. Íslendingar keppa víða um heim á næstu dögum og safna dýrmætum stigum, reynslu og sjálfstrausti inn í keppnistímabilið.

Alpagreinar, Evrópubikar og FIS-mót í Finnlandi, Svíþjóð og Noregi

Gauti Guðmundsson og Bjarni Þór Hauksson hefja keppnishelgina á morgun þegar þeir taka þátt í Evrópubikarmóti í svigi í Levi, Finnlandi.

Um helgina mun svo allt karla landsliðið okkar, Gauti Guðmundsson, Jón Erik Sigurðsson, Matthías Kristinsson, Tobias Hansen, Bjarni Þór Hauksson og Pétur Reidar Pétursson, taka þátt í alþjóðlegum FIS-mótum í svigi í Levi.

Að þeim mótum loknum heldur hópurinn áfram til Svíþjóðar, þar sem keppt verður á næstu dögum, áður en ferðinni er heitið til Noregs þar sem frekari mót bíða þeirra.

Hófí Dóra Friðgreirsdóttir heldur einnig áfram sínu keppnistímabili og tekur þátt í alþjóðlegum stórsvigsmótum í Arosa, Sviss í næstu viku. Eftir það mætir hún til leiks í sínum fyrsta Evrópubikar á nýju tímabili þegar hún keppir í stórsvigi í Zinal, Sviss.

Skíðaganga, alþjóðleg mót í Gällivare og Scandinavian Cup í Östersund

Skíðagöngulandsliðið, Dagur, Kristrún, Einar Árni og Ástmar Helgi, eru stödd í Gällivare í Svíþjóð, þar sem þau taka þátt í sterkum alþjóðlegum mótum. Keppt verður í:

• Sprettgöngu á föstudag,

• 10 km klassískri göngu á laugardag,

• 10 km göngu með frjálsri aðferð á sunnudag.

Í kjölfarið heldur liðið til Östersund, þar sem það tekur þátt í Scandinavian Cup, einni af stærstu og sterkustu mótaröðum Evrópu í skíðagöngu.

Snjóbretti, Big Air Heimsbikar í Kína og Bandaríkjunum

Snjóbrettalandsliðið heldur nú til Kína, þar sem Anna Kamilla Hlynsdóttir og Arnór Dagur Þóroddsson taka þátt í Heimsbikarmótum í Big Air í Secret Garden og Peking. Þar reyna þau að tryggja sér sæti á Ólympíuleikana.

Að loknum keppnum í Kína fljúga þau beint til Bandaríkjanna, þar sem þau taka þátt í Big Air keppni í Steamboat, einu af stórmótum vetrarins. 

Skíðasambandið óskar sínu fólki góðs gengis og hlakkar til að fylgjast með þeim næstu vikurnar. 

Hægt er að fylgjast með live timing á heimasíðu FIS