Freydís í 6.sæti í Norður Ameríku álfukeppni

Seinni partinn í dag keppti Freydís Halla Einarsdóttir á svigmóti í Burke Mountain í Bandaríkjunum en mótið er hluti af Norður Ameríku álfukeppninni (NAC) sem er sú sterkasta í Bandaríkjunum. Freydís hóf leik númer 21 en eftir fyrri ferðina var hún í 12.sæti. Í seinni ferðinni skíðaði Freydís gríðarlega vel og var með þriðja besta tímann og endaði að lokum í 6.sæti. Fyrir árangurinn fær Freydís 42.99 FIS stig sem eru aðeins frá hennar punktastöðu á heimslista. Að loknu tímabilinu er krýndur stigameistari í hverri grein í öllum álfukeppnum og fyrir þetta mót fékk Freydís 40 NAC svig stig. Eftir mótið er Freydís í 17.sæti á stigalistanum í svigi í Norður Ameríku álfukeppninni.

Þrátt fyrir að einungis sé 5.janúar í dag var þetta fjórða mótið hennar Freydísar á árinu 2017. Um var að ræða fjögurra móta mótaröð í Burke Mountain þar sem keppt var í tveimur stórsvigum 2.-3.janúar og tveimur svigum 4.-5.janúar. Freydís náði ekki að komast í seinni ferð í fyrra stórsviginu en einungis 60 bestu að henni lokinni komust í seinni ferðina. Í seinna stórsviginu endaði hún 39.sæti og í fyrra svigmótinu náði hún ekki að ljúka fyrri ferð. En eins og áður segir endaði hún svo í 6.sæti í svigmóti dagsins.

Öll úrslit frá mótunum má sjá hér.