Freydís Halla í 14.sæti í Norður-Ameríku bikar

Freydís Halla Einarsdóttir keppti á sínum fyrstu mótum í Norður-Ameríku bikar um helgina og skoraði einnig sín fyrstu stig í keppninni. Í hverri heimsálfu er bikarkeppni og má segja að það sé svokölluð B keppni á eftir heimsbikar. Eins og nafnið, Norður-Ameríku bikar, gefur til kynna er þetta keppni sem fer fram í Bandaríkjunum og Kanada. Í Norður-Ameríku bikaranum komast einungis 60 bestu í seinni ferðina og 30 bestu fá stig inní keppnina.

Freydís keppti á tveimur stórsvigmótum og tveimur svigmótum. Öll mótin fóru fram í Kanada en stórsvigsmótin fóru fram í Mont Garceau en svigmótin í Tremblant. 

Um helgina fóru fram svigmótin og í dag gerði Freydís Halla sér lítið fyrir og endaði í 14.sæti og fær fyrir vikið 18 stig í svigkeppni Norður-Ameríku bikarsins. Hún var í 21.sæti eftir fyrri ferðina en átti 14. besta tíman í þeirri seinni og endaði því í 14.sætinu. Það voru 112 konur sem hófu keppni á mótinu í dag en eins og áður segir voru einungis 60 bestu þeirra sem fóru seinni ferðina, en að lokum voru 51 keppandi sem kláraði keppni í dag. Í gær keppti hún einnig í svigi en náði ekki að klára fyrri ferðina. 

Fyrir helgi keppti Freydís í tveimur stórsvigsmótum en í því fyrra endaði hún í 28.sæti og fékk fyrir það 3 stig í stórsvigskeppni Norður-Ameríku bikarsins. Fyrir það mót fékk hún 51.34 FIS en það er hennar næst besta mót í vetur og mun því bæta punktastöðuna hennar á heimslistanum í stórsvigi. Á seinna mótinu endaði Freydís í 37.sæti. 

Freydís er búinn að standa sig gríðarlega vel það sem af er vetri, hún hefur verið fjórum sinnum á verðlaunapalli, bætt FIS punkta sína í bæði svigi og stórsvigi og skorað stig í Norður-Ameríku bikar í svigi og stórsvigi. 

Hér má sjá úrslit úr stórsvigsmótunum og hér úr svigmótunum. Hér að neðan má svo sjá úrslit í dag.