Frábær dagur hjá Snorra - 27.sæti í eltigöngu

Í dag lauk heimsbikarhelginni í Ruka með keppni í 15 km eltigöngu með frjálsri aðferð. Eltiganga er þannig að ræst var út í dag eftir samanlögðum árangri úr fyrstu tveimur keppnunum. Þannig að sá keppandi með besta árangurinn fór fyrstur af stað, með forskot og svo koll af kolli fóru næstu keppendur af stað og sá sem klárar fyrstur í mark sigrar. Snorri Einarsson var með 29. besta árangurinn eftir fyrstu tvo keppnisdagana og lagði því af stað 29. í rásröðinni. Keppnin var virkilega spennandi og að lokum hafnaði Snorri í 27.sæti og náði því að vinna sig upp um tvö sæti.

Þrátt fyrir að keppni dagsins hafi verið eltiganga eru í raun tvö úrslit fyrir daginn. Annars vegar fyrir eltigönguna þar sem Snorri endaði 27. og hins vegar fyrir keppni í 15 km göngu með frjálsri aðferð (ekkert forskot) og þar endaði Snorri í 37.sæti.

Eftir mót helgarinnar er Snorri kominn með 17 heimsbikarstig, níu stig fyrir gönguna í gær og átta stig fyrir eltigönguna í dag. Er hann sem stendur í 34.sæti í heildarstigakeppninni og í 31.sæti í keppni í lengri vegalengdum.

Um næstu helgi mun Snorri keppa á heimsbikarmóti í Lillehammer í Noregi. Á laugardeginum verður keppt í sprettgöngu og á sunnudeginum í 30 km skiptigöngu.

Hér að neðan má sjá úrslit dagsins í eltigöngunni. Næst aftast má sjá úrslit úr göngu dagsins án forskotsins. Öll úrslit má sjá hér.