PyeongChang 2018 - Snorri Einarsson í 56.sæti

Fyrsti íslenski keppandinn til að taka þátt á 23. Vetrarólympíuleikunum var Snorri Einarsson þegar hann tók þátt í 30 km skiptigöngu fyrr í dag. Skiptiganga fer þannig fram að byrjað er að ganga 15 km með hefðbundinni aðferð. Þegar þeim hluta er lokið skipta keppendur um skíði og stafi og ganga svo 15 km með frjálsri aðferð. 

Aðstæður í brautinni voru góðar, stífur og harðpakkaður snjór. Mikill kuldi hefur verið í Suður-Kóreu undanfarna daga og enginn breyting var þar á í dag. Um 13° frost var á mótsstað og þó nokkur vindur.

Snorri Einarsson hóf keppni í dag með númer 48 af alls 68 keppendum sem voru skráðir til leiks. Ræst var með hópstarti og strax í byrjun var mikill hasar í brautinni. Snorri gerði vel í byrjun og náði að vinna sig upp 15 sæti á fyrsta kílómetranum. Eftir það lendir hann í óhappi þegar ól á stafnum slitnar en fljótlega eftir það það fékk hann nýjan staf, sem var þó mun minni en hann notar. Það var svo ekki fyrr en eftir 6 km sem hann fær staf í réttri lengd. Mikil vinna fór í þetta stafavesen og bilið í fyrstu menn orðið langt. Eftir þetta náði hann þó aðeins betri stöðugleika í sína göngu en kuldinn og fleiri atriði voru að trufla hann. Þetta var einfaldlega ekki hans dagur og hefur hann sýnt það fyrr í vetur að hann á mikið inni. Að lokum fór að Snorri endaði í 56.sæti.

Hér að neðan má sjá helstu úrslit og heildarúrslit má nálgast hér.

Snorri keppir næst í 15 km göngu með frjálsri aðferð föstudaginn 16. febrúar. Næsti keppandi sem tekur þátt í skíðagöngu er hins vegar Isak Stianson Pedersen sem keppir í sprettgöngu þriðjudaginn 13. febrúar.