Margir sterkir keppendur eru skráðir til leiks í ár. Þeirra á meðal er hin svissneska Seraina Boner og sambýlismaður hennar Toni Livers. Boner er ein sterkasta skíðagöngukona heims í lengri vegalengdum, en í vetur hefur hún t.a.m. sigrað í Birkibeinagöngunni, Marcialonga á Ítalíu og Ski Classics stigakeppninni. Toni Livers er margreindur úr heimsbikarnum, Ólympíuleikum og heimsmeistaramótum. Hið sama má segja um Eistann Peeter Kümmel, sem nú keppir í Fossavatnsgöngunni í fyrsta sinn. Svíinn Marcus Jönsson, sem sigraði í Fossavatnsgöngunni 2010 og 2012, er nú mættur enn á ný og stefnir ótrauður á sinn þriðja sigur. Ekki má heldur gleyma hinum finnska Teemu Virtanen, sem samkvæmt Heimsmetabók Guinnes er sá maður sem hefur gengið lengsta vegalengd á skíðum á einum sólarhring, ríflega 433 km! Nánari upplýsingar má finna hér

Þótt stjörnurnar setji vissulega skemmtilegan svip á mótið þá má ekki gleyma því að Fossavatnsgangan er almenningsganga þar sem allir eiga að njóta sín á sínum eigin forsendum, hvort sem við erum keppnisfólk eða trimmarar, reynsluboltar eða byrjendur, börn eða eldri borgarar.